D. Szëmikòwsczi

Wszëtcë, co sã zajimają kaszëbsczima sprawama, a òsoblëwie przińdnotą Kaszëbów ë kaszëbiznë, mòglë sã spòtkac 25 gromicznika w Gduńsku, w tawernie „Mestwin”, żebë wësłëchac, co mają do pòwiedzeniô ò nym ùczałi z Kaszëbsczégò Jinstitutu ë Gduńsczégò Ùniwersyteta (seminarëjô bëła przëszëkòwónô bez Kaszëbsczi Jinstitut ë Gduńsczi Part Kaszëbskò-Pòmòrsczégò Zrzeszeniô).

Na zôczątkù, prof. Józef Bòrzëszkòwsczi przeczëtôł wëjimk z przemëslenków Tadeusza Bòlduna, pózni gôdôł ò kòngresach z lat 90. XX w., to je ò kaszëbsczim, kòcewsczim ë pòmòrsczim, ò jich ùdbach ë realizacëji. Prof. Jerzi Tréder swój referat pòswiãcôł sprawóm bëcégò kaszëbsczégò jãzëka w lëteraturze, szkòle, mediach ë Kòscele, prof. Cezari Òbrôcht-Prondzyńsczi gôdôł ò dzejanim Kaszëbskò-Pòmòrsczégò Zrzeszeniô, zôs dr Grégòr Grzelôk ò môlu kaszëbskò-pòmòrsczi resznotë na pòliticzny zdrzadni Pòmòrzégò ë Pòlsczi.

Pò wësłëchanim òdczëtënków przëszedł czas na òbgôdkã, w jaczi midzë jinyma wëpòwiôdelë sã Artur Jabłońsczi, przédnik Zrzeszëniô, prof. Bruno Sënôk (wiceprzédnik), dr Janusz Kòwalsczi, wëdôwca Wòjcech Czedrowsczi, Stanisłôw Geppert, prowôdnik jinternotwi starnë www.naszekaszuby.pl. Wnet wszëtcë diskùtańcë baro kriticzno gôdelë ò referatach, òsoblewie ò pòzdrzatku profesorów Bòrzëszkòwsczégò ë Prondzyńsczégò. Nót je nadczidnąc, że nen drëdżi ùczałi w swòjim wëstąpienim, gôdającë ò Zrzeszenim ë jegò nôleżnikach, rzekł ò „patologòwi juwernocë”, a nawetka ò mùszu òdsëniãcô niechtërnëch lëdzy ze Zrzesznégò.

Móm nôdzejã, że referate mdą wnet òpùblikòwóné ë tedë mdze czas (jaczégò zafelało w „Mestwinie”) na szerszą diskùsëjã. Terô mòżna le rzec, że chòc profesorowie Bòrzëszkòwsczi ë Prondzyńsczi dosc wiele gôdelë (chòc nick w referetach, a dopierzë w diskùsji) ò dialogù z tima wszëtczima, co jinaczi mëszlą niżle òni, to tak pò prôwdze mało chto w to ùwierzôł. Kò niejeden z bëtników mógł miec doznanié, że òni ë tak – wedle swòji dbë – wiedno mają racjã.

Mòżna rzec, że pòmión stôrëch ùkôzków (ò jaczich téż bëła mòwa w òbgôdce) wcyg jidze pò Kaszëbach. A pò drodze są jesz nowé strôszczi (chòcbë tak nazwóny kaszëbsczi radikałowie)! Në, tej ni ma sã co dzëwic, że tegò wszëtczégò je ju za wiele, że mòżna sã tegò przëstraszëc. A jiny człowiek, a jiny pòzdrzatk – miast ceszëc – je niedrëchã, czë jaczims zagrożenim!

zôczątk