W dniach 19-20 maja, we Wiôldżi Wsë òdbëła sã III Kònferencjô Dlô Szkólnëch Regionalistów. Témą negò zéńdzeniô béł „Etos Kaszubów w literaturze”.

Kònferencjô skłôda sã z dwùch dzélów. Teòreticznégò ë prakticznégò. Pierszégò dnia, ùczestnicë mòglë wësłëchac szterzech referatów tikającëch sã kaszëbsczi lëteraturë. Dwa bëłë ò twórczoscë Augùstina Necla, co zrzeszoné je z Rokã A. Necla w pùcczim pòwiece. Ks. prof. Henrik Skòrowsczi gôdôł ò etose Kaszëbów w dokôzach Necla, a Mirosłôw Kùklik – direchtór pùcczégò mùzeùm, ò przedatnoscë neclowëch ksążków w etnograficznëch badérowaniach. Dr Adela Kuik-Kalinowskô zaprezentowała kaszëbsczi swiat w ksążkach Annë Łajming. Òglowò ò kaszëbsczi, dzysdniowi pismieniznë gôdôł Stanisłôw Janke.

– Na kònferencjô mô za zadanié jintegracjã strzodowiska szkólnëch regionalistów ë promòcjã nordowëch Kaszëb – gôdô òrganizatorka Aneta Szopny.

W piątkòwi wieczór òdbëła sã kaszëbskô biesada. Przë zwãkach lëdowi mùzyczi mòżna bëło zjesc bëlné rëbacczé zjestkù a téż pòkòrbic ò dzysdniowi kaszëbiznie.

Sobòta bëła dniã robocym. Ùczestnicë kònferencjë wërëszëlë w rézã szlachã żëcégò „pisôrza spòd rozewsczi blizë”. Nôprzód òdwiedzëlë Chłapòwò, wies w chtërny Necel sã ùrodzëł. Pòtémù na jegò grobie we Wiôldżi Wsë złożoné òstałë kwiatë. Dali réza szła Hélsczim Półwëspã. Zwiedzony òstôł Hél a pòtémù Jastarniô. Tam téż òdbëła sã projekcjô filmù pt. Kaszëbë z 1971 r., w jaczim główną rolã grôł Jan Piepka.

Na zakùńczenié chto le chcôł mógł pòpłënąc rëbacczim bôtã na Bôłt z hôwindżi we Wiôldżi Wsë.

Òrganizatorama latosy kònferencjë bëłë: Pòwiatowô Biblioteka Pùblicznô w Pùckù, Mùzeùm Pùcczi Zemi m. F. Ceynowë, Éwa Kòwnackô – człónk Zarządë Pùcczégò Pòwiatë, Òglowi Zarząd Kaszëbskò-Pòmòrsczégò Zrzeszeniô, ë K-PZ ò. Wiôlgô Wies. Medialnym patronã bëła „Kaszëbskô Òdroda”.

Za rok kònferencjô òdbãdze sã w Wejrowie.

Róman Drzéżdżón

zôczątk