Lato. Nôpësznészi cząd rokù. Jak je lato, tej ë latowé ferie. Słunuszkò fejn swiécy, cepełkò, wòda w mòrzim czë jezorze jak war.

Gdzes bë rôd wërézowôł. Ale dze? Mòże w Mirochòwsczé Lasë? Czemù nié. Swiéżim lëftã so mòże pòòddichac a zdrok snôżim widokã napasc.

Leno że nôprzód, na pierszim placu nót je 1 lëpińca do Gdinie zajachac. Tam VIII Zjôzd Kaszëbów bdze fejrowóny. Na binie bdze sã wiele dzało – lëdowé ë młodzeznowé karna wëstąpią, a na stojiszczach bdze sã mógł we wszelejaczé kaszëbsczé fizmatińczi zaòpatrzëc, kòszlã z grifã kùpic, ksążkã abò tobaczérã.

Tak bëlno zaòpatrzóny człowiek mòże za greńcã wëjachac. Na przëmiôr do robòtë na Britijsczé Wëspë. Wëjachac mòże. Czemù nié, leno blós pò to, bë kąsyczk dëtka zarobic, ë wrócëc, bë na najich Kaszëbach jaczis dobri „jinteres rozkrącëc”, abò na kaszëbistikã sã zapisac. Doch ni mô jak doma!

Jednakò, czë to na Kaszëbach, Pòlsce czë za greńcą wôrt miec przë se nają gazétã! Z „Òdrodą” na wanogã!

Òddôwómë Wama Tczëwôrtny Czëtińcowie drëdżi latosy numer „Kaszëbsczi Òdrodë”. Wiele lëdzy sã pitô: co je nôwôżniészé a nym kaszëbsczim dzejanim? Wierã zachòwanié najégò jãzëka. Temù téż òpisëjemë na najich stronach wszelejaczé témë pò kaszëbskù. A czemùż nie pisac ò nôùkòwëch ùdbach w naji rodny mòwie, abò ò historie czë jinszëch wôżnëch sprawach. Kaszëbsczi, tak samò jak jinszé jãzëczi swiata baro dobrze sã do tegò nôdôwô. Nié blós do szpòrtów czë fifów, ale téż do sprôw z wëższi pòlëcë.

Żëcząc słunkòwégò ùrlopù rôczã serdeczno do lechturë „Kaszëbsczi Òdrodë”.

Róman Drzéżdżón

zôczątk